Akmal Saidov: O‘zbekiston hech qanday harbiy tuzilmalarga qo‘shilmaydi

O‘zbekiston hech qanday harbiy tuzilmalarga qo‘shilmaydi va Yevroosiyo iqtisodiy ittifoqida (YEOII) kuzatuvchi davlat sifatida qoladi. Bu haqda Oliy Majlis Qonunchilik palatasi spikerining birinchi o‘rinbosari Akmal Saidov Toshkentda o‘tkazilgan Xalqaro sheriklik tashabbuslari haftaligi ochilishida maʼlum qildi.

Fergana.media muxbirining O‘zbekiston boshqa davlatlar bilan yaqin hamkorlik qilish maqsadida o‘z suverenitetini cheklashga rozi bo‘ladimi, degan savoliga Saidov salbiy javob berdi.

"Konstitutsiyamizning birinchi moddasida O‘zbekiston suveren davlat ekanligi qayd etilgan. Agar biz har qanday harbiylashtirilgan mudofaa tuzilmalari va tashkilotlariga qo‘shilish haqida gapiradigan bo‘lsak, unda yo‘q, biz bunga yo‘l qo‘ymaymiz. Biz yigitlarimizni hech qachon harbiy missiyalarni, shu jumladan tinchlikparvarlik missiyalarini bajarish uchun [chet elga] yubormaymiz. Hududimizda xorijiy harbiy bazalar bo‘lmaydi", dedi vitse-spiker.

Yevroosiyo iqtisodiy ittifoqiga integratsiyaga kelsak, bu tashkilotda O‘zbekiston uchun kuzatuvchi davlat maqomi ko‘proq mos keladi, dedi Saidov.

"Men O‘zbekistonning YEOIIga kirish imkoniyatlarini o‘rganish bo‘yicha parlament komissiyasi rahbariman. Biz ushbu tashkilotning mingdan ortiq turli hujjatlarini sinchiklab o‘rganib chiqdik va bugun shunday xulosaga keldik — O‘zbekiston YEOIIda kuzatuvchi maqomini saqlab qolishdan manfaatdor", dedi u.

Saidovning so‘zlariga ko‘ra, Qozog‘iston YEOIIga qo‘shilishdan juda kam foyda olgan. O‘zbekiston tashqi siyosatining asosiy tamoyillari esa Konstitutsiyaning yangi tahririda mustahkamlab qo‘yilgan va ularga qatʼiy amal qilinadi.

YEOII 2001 yilda tashkil qilingan bo‘lib, unga Armaniston, Belarus, Qozog‘iston, Qirg‘iziston va Rossiya aʼzo sanaladi. Moldova va Kuba, shuningdek, 2020 yil dekabr oyida O‘zbekiston kuzatuvchi davlat maqomini olgan.