O'zbekiston elchisi Andorra Tashqi ishlar vazirligiga ishonch yorliqlari nusxalarini topshirdi

O'zbekistonning Andorraga birinchi Favqulodda va Muxtor Elchisi Farrux Tursunov kecha ushbu davlat tashqi ishlar vaziri Imma Tor Fausga ishonch yorliqlari nusxalarini topshirdi.

Uchrashuvda ikki davlat o'rtasidagi ikki tomonlama hamkorlikni rivojlantirish istiqbollari muhokama qilindi.

Vazir Imma Tor Faus O'zbekistonda so'nggi yillarda amalga oshirilayotgan islohotlarni yuqori baholab, respublika Markaziy Osiyo mintaqasi taraqqiyotiga salmoqli hissa qo'shayotgan lokomotivga aylanganini ta'kidladi. Toshkent va Afg'oniston o'rtasidagi faol muloqotga, jumladan, O'zbekistondan insonparvarlik va ijtimoiy yordam ko'rsatish, ayollar huquqlarini himoya qilish va afg'on yoshlari uchun ta'lim dasturlarini tashkil etishda amaliy yordamga alohida e'tibor qaratildi.

Andorra TIV rahbari, shuningdek, O'zbekistonning xalqaro tashkilotlar doirasidagi tashabbuslari, ayniqsa, atrof-muhit va iqlim o'zgarishi masalalarida muhimligini qayd etdi.

"O'zbekistonning Andorraga yangi elchisining tayinlanishi ikki mamlakat o'rtasida turli sohalarda, jumladan, savdo-iqtisodiy sohada, shuningdek, turizm, xususan, tog' turizmi kabi sohalarni qo'llab-quvvatlashdagi hamkorlikni faollashtirishga xizmat qiladi", dedi u.

Uchrashuv yakunida Andorra tomoni O'zbekistonda bo'lib o'tadigan xalqaro tadbirlarda, jumladan, Parlamentlararo ittifoq va YUNESKO yig'ilishlarida ishtirok etish uchun Knyazlikning yuqori martabali vakillarini yuborishga tayyorligini tasdiqladi.