Pragada rossiyaliklarga Chexiya fuqaroligini berish vaqtincha taqiqlandi

Chexiya prezidenti Petr Pavel Rossiya fuqarolariga ushbu davlat fuqaroligini berishni vaqtincha taqiqlovchi qonunni imzoladi. Chexiya davlati rahbari saytida 6 fevral, payshanba kuni e’lon qilingan xabarga ko‘ra, aksariyat rossiyaliklar Rossiya pasportidan voz kechgan taqdirda ham Chexiya fuqaroligini ololmaydi: ularning Chexiya fuqaroligini olish haqidagi arizalari Ukrainadagi urush tugaguniga qadar muzlatib qo‘yiladi. Faqat siyosiy qochqinlar va 15 yoshgacha bo‘lgan bolalar uchun istisno qilinadi.

Ukrainalik qochqinlarni qabul qilish

Hujjatning asosiy qismida ukrainalik qochqinlarni Chexiyaga qabul qilish tartibi belgilangan. Qabul qilish tartibi bir yilga uzaytirildi va vaqtinchalik himoya qochqinlarga davlat tibbiy sug‘urtasi, shuningdek, ta’lim tizimi va mehnat bozoriga kirish imkonini beradi. Tuzatish iqtisodiy jihatdan mustaqil qochqinlarga maxsus yashash uchun ruxsat olish imkonini yaratadi, bu esa keyinchalik ularga mamlakatda doimiy qolishga imkon beradi.

Shu bilan birga, hujjat ukrainalik bolalarni Chexiyadagi davlat va shahar maktablariga qabul qilish tartibini murakkablashtiradi. Qonunning ushbu qoidasi kamsitish sifatida tanqid qilindi.

Chexiya Jinoyat kodeksida yangi modda

Bundan tashqari, Chexiya Jinoyat kodeksiga xorijiy davlat bilan ruxsatsiz hamkorlik qilishni taqiqlovchi modda qo‘shildi. Mamlakatning eng yirik muxolifat partiyasi rahbari, sobiq bosh vazir Andrey Babish ushbu tuzatishni tanqid qilib, uni Chexoslovakiyada kommunizm qulagandan beri «so‘z erkinligi va demokratiyaga qilingan eng shafqatsiz hujum» deb atadi.

Hujjat mualliflari ushbu qoidalarni Chexiya Respublikasining milliy xavfsizligi manfaatlariga mos kelishi bilan izohladilar.