Zelenskiy tinchlik muzokaralari uchun delegatsiya tarkibini tasdiqladi

Ukraina prezidenti Vladimir Zelenskiy tinchlik muzokaralari uchun Ukraina delegatsiyasi tarkibini tasdiqladi. Tegishli farmoyish 15-mart, shanba kuni davlat rahbarining rasmiy saytida e’lon qilindi. Uning matniga ko‘ra, muzokaralar guruhi tarkibiga Ukraina prezidenti devoni rahbari Andrey Yermak, uning o‘rinbosari Pavel Palisa, Ukraina tashqi ishlar vazirligi rahbari Andrey Sibiga va Ukraina mudofaa vaziri Rustem Umerov kiritilgan. 11-mart kuni Saudiya Arabistonining Jidda shahrida AQSh delegatsiyasi bilan bo‘lib o‘tgan muzokaralarda aynan Ukraina vakillari ishtirok etgan.

Buyruqda qayd etilishicha, Ukraina delegatsiyasiga Yermak boshchilik qiladi. Unga Ukraina Tashqi ishlar vazirligi bilan kelishilgan holda muzokaralar guruhi tarkibiga o‘zgartirishlar kiritish va uning ishiga hukumat vakillari, ekspertlar va ilmiy maslahatchilarni jalb qilish huquqi beriladi.

Ukraina 30 kunlik sulhga rozi bo'ldi, Rossiya - hali emas

Jiddadagi muzokaralarda Ukraina AQShning 30 kunlik vaqtinchalik o‘t ochishni to‘xtatish haqidagi taklifiga rozi bo‘ldi, biroq Rossiya hali ham bunga rozilik bermayapti, Rossiya prezidenti Vladimir Putin hech qanday aniq kafolatlar yoki va’dalarsiz bunday qadamga rozi bo‘lishi dargumon, deb yozadi Reuters 12-mart kuni rossiyalik manbalarga tayanib.

Ukraina tashqi ishlar vaziri Sibiga 14-mart kuni bo‘lib o‘tgan matbuot anjumanida Ukraina ehtimoliy sulhni kuzatish uchun tegishli “algoritmlar”ni ishlab chiqish bo‘yicha guruh tuzishga kirishganini aytdi. "Biz allaqachon mumkin bo'lgan sulhni to'g'ri nazorat qilish uchun tegishli harakat algoritmlarini ishlab chiqadigan milliy jamoani shakllantirishni boshladik", dedi u.

O‘z navbatida, AQSh prezidenti Donald Tramp o‘sha kuni o‘zining Truth Social ijtimoiy tarmog‘ida Vladimir Putin bilan “yaxshi va samarali” muzokaralar olib borilganini e’lon qildi va Ukrainadagi urushni tugatishga umid bildirdi.