Xatirchida YTHda ikki o‘quvchi qiz o‘limiga sababchi bo‘lgan o‘qituvchi 5 yilga qamaldi

Jinoyat ishlari bo‘yicha Navoiy viloyati Xatirchi tumani sudi mashinasida ikki o‘quvchi qizni urib ketgan o‘qituvchiga hukm o‘qidi.

Ish materiallariga ko‘ra, 12-aprel kuni ertalab 46-maktab o‘qituvchisi 57 yoshli G‘ulom Qilichev (muqaddam sudlangan, to‘rt farzandning otasi) bir qator yo‘l harakati qoidalarini buzgan va boshqaruvni yo‘qotib, yo‘l chetiga chiqib ketish oqibatida ikki qizni urib yuborgan. YTH Tasmachi mahallasidan o‘tgan 4P269 “Qovoq-Tasmachi-Mirdosh” avtomobil yo‘lining 12−13-kilometrida sodir bo‘lgan.

Oqibatda, sud-tibbiyot ekspertizasi xulosasiga ko‘ra, professional ta’lim maktabining ikkinchi kurs o‘quvchisi 1−2-umurtqalarining sinishi, orqa miya ezilishi, siniqlar atrofidagi yumshoq to‘qimalariga qizil-qora qon quyilishi, tanasidagi ko‘plab shilinma va qontalashlar ko‘rinishidagi hayot uchun xavfli jarohatlar olishi sabab voqea joyida vafot etgan.

Ikkinchi qiz, 17-maktabning 8-sinf o‘quvchisi esa bosh miya yopiq jarohati, bosh miya pardalari ostiga, to‘qimalariga va qorinchalariga qon quyilishi, 1−2-bo‘yin umurtqalari sinishi, tepa, ensa, chakka yumshoq to‘qimalari ostiga qizil-qora qon quyilishi, tanasidagi lat, yara, qontalashlar va shilinmalar ko‘rinishidagi xavfli jarohatlar bilan kasalxonaga yotqizilgan. U 14-aprel kuni tibbiy muassasada vafot etgan.

Sud majlisida ayblanuvchi o‘z aybiga iqror bo‘lmadi. Uning aytishicha, o‘sha kuni o‘g‘li sovg‘a qilgan Cobalt avtomashinasida xotini bilan Kattaqo‘rg‘on tumani Yonboshsoy mahallasida yashovchi qarindoshlari uyidagi dafn marosimidan qaytayotgan bo‘lgan.

Haydovchining so‘zlariga ko‘ra, u boshqaruv vaqtida chalg‘igan, shu sababli mashina yo‘l chetiga chiqib ketgan va u ikki qizni urib yuborgan. Shundan so‘ng, Qilichevning so‘zlariga ko‘ra, u darhol mashinani to‘xtatgan va qizlardan biri bedazor ichida, ikkinchisi esa yo‘l chetida yotganini ko‘rgan. U yaqin atrofdagi odamlar yordamida jabrlanuvchilarni mashinasida shifoxonaga olib borgan. U ularning oila a’zolaridan kechirim so‘ragani va chin ko‘ngildan pushaymonligini bildirib, suddan jazoni yengillashtirishni so‘radi.

Maktab o‘quvchisining otasining sudda aytishicha, 12-aprel kuni qizi qaynonasining uyiga qaynonasining qizi (xotinning opasi) bilan birga ish bilan borgan. U moddiy va ma’naviy zararni qoplashga muhtoj emasligini aytib, jazo qo‘llash bo‘yicha qarorni sud ixtiyoriga qoldirdi.

Professional maktab o‘quvchisining onasi qizidan buvisining uyidan tuz olib kelishni so‘raganini aytdi. Qizga jiyani ham qo‘shilgan. Shuningdek, ayol moddiy va ma’naviy zararni qoplashni talab qilmagan va sudlanuvchiga nisbatan hech qanday da’vosi yo‘qligini bildirgan.

Haydovchining xotinining aytishicha, o‘sha kuni mashina yo‘l chetiga chiqib keta boshlagan va u eriga “Ey, qarang, ey!” deya baqirgan, shundan so‘ng qizlarga urilgan.

Sud G‘ulom Qilichevni Jinoyat kodeksining 266-moddasi 3-qismi “a” bandi (Odamlar o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan aybdor deb topdi. U 3 yil muddatga avtomashinani boshqarish huquqidan mahrum qilingan holda manzil koloniya rejimida 5 yil qamoq jazosiga hukm qilindi.

Uning oilasiga garov sifatida to‘langan 8 million so‘m qaytarildi.