14-iyun kuni O‘zbekistonda sodir bo‘lgan eng muhim voqealar dayjesti

Saudiya Arabistoni O‘zbekistonga 25 tonna xurmo hadya qildi

Saudiya Arabistonining “Podshoh Salmon” nomidagi insonparvarlik yordami markazi O'zbekistonga beg‘araz ko‘mak sifatida 25 tonna xurmo mevasini hadya qildi.

Qoraqalpog‘istondagi to‘yda yo‘l talashib, avtomobillarga shikast yetkazgan haydovchilar qamaldi

Nukus shahri sudi 13 nafar ishtirokchiga taalluqli ma’muriy ishni ko‘rib chiqdi.

“Oʻzbekiston temir yoʻllari” va Janubiy Koreyaning “Hyundai Rotem” kompaniyasi oʻrtasida elektropoyezdlar sotib olish shartnomasi imzolandi

Shartnomaga ko'ra, "Toshkent — Urganch — Xiva" yangi yo‘nalishi bo‘yicha elektropoyezdlar yetkazib beriladi.

Qirg‘iziston prezidenti Sadir Japarov O‘zbekistonga davlat tashrifi bilan kelishi kutilyapti

Yaqin vaqt ichida Qirg‘iziston prezidenti Sadir Japarovning O‘zbekistonga davlat tashrifi rejalashtirilgan.  Bu haqda Qirg‘iziston iqtisodiyot va savdo vaziri o‘rinbosari Sanjar Bolotov ma'lum qildi.

Humo to‘lov tizimini xususiylashtirish bo‘yicha konsultant tanlovi eʼlon qilindi

Davlat aktivlarini boshqarish agentligi tegishli xususiylashtirish dasturlariga muvofiq Humoning ustav kapitalidagi 100 foiz davlat ulushini ommaviy savdolar orqali xususiylashtirishni tashkillashtirish uchun professional konsalting kompaniyasini jalb etish yuzasidan tanlov eʼlon qildi.

O‘zbekiston va Koreya prezidentlarining tor doiradagi uchrashuvi bo‘lib o‘tdi

Shavkat Mirziyoyev hamda Yun Sok Yol alohida strategik sheriklik munosabatlarini yanada mustahkamlashga qat’iy intilishni tasdiqladilar. Shuningdek, mintaqaviy, jumladan, "Markaziy Osiyo – Koreya Respublikasi" formatidagi hamkorlik masalalari yuzasidan fikr almashildi.

Indoneziyaning O‘zbekistondagi elchisi Sunario Kartadinata Toshkentda vafot etdi

U 2019-yildan beri O‘zbekistonda diplomatik faoliyatini olib borayotgan edi. O‘zbekiston TIV rahbari Indoneziya elchisi vafoti munosabati bilan hamdardlik bildirdi.

DXX IIB boshlig‘i o‘rinbosarini iPhone 15 Pro Max bilan qo‘lga oldi

Qoraqalpog‘istonda fuqaroga tegishli sirni fosh qilib, uni mansab vakolatidan foydalangan holda javobgar qilmoqchi bo‘lgan Qo‘ng‘irot tumani IIB boshlig‘i o‘rinbosari tovlamachilikda ayblanmoqda. U fuqarodan iPhone 15 Pro Max talab qilgan.

Shavkat Mirziyoyev va Yun Sok Yol muzokaralarni ikki mamlakat rasmiy delegatsiyalari ishtirokida davom ettirdi

Muzokaralar chog‘ida kelgusi 3 yil uchun O‘zbekiston-Koreya alohida strategik sherikligining yangi yuqori texnologiyali kun tartibini shakllantirish muhimligi ta’kidlandi. Davlatimiz rahbari buni “Ikki mamlakatning yuqori texnologiyali va innovatsion hamkorligining yangi davri” deb e’lon qilish tashabbusi bilan chiqdi. Bundan tashqari, kelgusi yilni “O‘zbekiston va Koreya o‘rtasidagi o‘zaro almashinuvlar yili” deb e’lon qilish va o‘zaro madaniy tadbirlarni o‘tkazish taklif qilindi. 2027-yilda O‘zbekistonda koreys diasporasi istiqomat qilayotganining 90 yilligi keng nishonlanadi.

Shavkat Mirziyoyev va Yun Sok Yol 17 ta hujjat imzoladi

Davlat rahbarlari alohida strategik sheriklikni yanada chuqurlashtirish va har tomonlama kengaytirish to‘g‘risidagi qo‘shma bayonotni imzoladi.

Dam olish kunlari So‘qoq va Chimyonga boruvchi yo‘llarda bir tomonlama harakat tashkil etiladi

16-17-18-iyun kunlari Parkent tumanining So‘qoq va Qiziltog‘ qishloqlariga va Bo‘stonliq tumanining Chimyon qishlog‘iga olib boruvchi yo‘llarda avtomobil harakati bir tomonlama tashkil etiladi.

“Koreya bizdan ancha olisda joylashgan bo‘lsa-da, xalqlarimizning urf-odat va qadriyatlari, maʼnaviy olami va dunyoqarashi bir-biriga o‘xshashdir” — Shavkat Mirziyoyev

Shavkat Mirziyoyev va Koreya Respublikasi prezidenti Yun Sok Yol ommaviy axborot vositalari vakillari uchun bayonot bilan chiqdi.

Jahon banki O‘zbekistonga 7,5 mln dollar miqdorida grant mablag‘i ajratdi

Ajratilgan mablag‘lar respublikani yashil iqtisodiyotga o‘tish jarayonini jadallashtirish, issiqxona gazlarini chiqarilishini monitoring qilish tizimini tashkil qilish kabi bir qancha sohalarga yo‘naltiriladi.

Shavkat Mirziyoyev va Yun Sok Yol birgalikda daraxt ekdilar

O‘zbekiston bilan Koreya o‘rtasidagi oliy darajadagi muzokaralar yakunida Ko‘ksaroy qarorgohida daraxt ekish marosimi bo‘lib o‘tdi.

2023-yilda narkojinoyat sodir etganlarning 31 foizdan ortig‘i yoshlar bo‘lgan

Tahlillarga ko‘ra narkojinoyat sodir etgan yoshlarning soni yildan yilga o‘sib bormoqda. Xususan, 2021-yilda bunday jinoyatlar sodir qilganlarning 23 foizni yoshlar tashkil qilgan bo‘lsa, 2022-yilda 24,6 foizga, 2023-yilda esa 31,2 foizga yetgan.

Britaniya O‘zbekistondan mavsumiy ishchilarni yollashni davom ettirmoqchi

2025-yilda Buyuk Britaniya hukumati tashqi ishchi kuchining umumiy sonini 40 ming kishiga yetkazmoqchi, ularning maʼlum qismi Markaziy Osiyodan jalb qilinadi.

Namangandagi bilyard klubida janjal sodir bo‘ldi

“Bolam nafas ololmay yotibdi, ular menga pul taklif qilishyapti” – ijtimoiy tarmoqlarda o‘g‘lini 5 nafar yigit kaltaklagani bo‘yicha murojaat qilib chiqqan onaning videosi tarqaldi. Holat yuzasidan Namangan viloyati IIB munosabat bildirdi.