15-may kuni O‘zbekistonda sodir bo‘lgan eng muhim voqealar dayjesti

Zargarlik uchun qimmatbaho toshlarni olib kirish soliqdan ozod qilindi

Zargarlik buyumlarini ishlab chiqarish uchun foydalaniladigan qimmatbaho toshlarni O'zbekiston hududiga olib kirish qo'shilgan qiymat solig'idan 2024-yil 1-yanvardan 2027-yil 1-yanvargacha ozod qilinadi.

Aprel oyida O'zbekiston avtomobil bozorida savdolar pasaydi

Aprel oyi yakunlariga ko‘ra, mamlakatda avtotransport vositalarining umumiy savdosi 19%ga kamayib, 88,3 mingta avtomobilni tashkil etdi. Aksincha, elektromobillar bozori aprel oyida yuqori savdo ko‘rsatkichlarini namoyish qildi. Aprel oyida yengil elektromobillar sotuvi 2,9 mingtani tashkil etdi, bu mart oyidagi ko‘rsatkichga nisbatan 23,2%ga ko‘proq.

Xorazmda voyaga yetmagan bola ko‘p qavatli uyning 5-qavatidan tushib ketdi

Bosh prokuraturaning xabar berishicha, ushbu holat yuzasidan tergovga qadar tekshiruv harakatlari olib borilmoqda.

Qashqadaryoda otasi tomonidan zo‘ravonlikka uchragan opa-singilga xolasi vasiy bo‘ldi

Avvalroq, Qashqadaryo viloyatida yashovchi opa-singil otasi tomonidan turli shakldagi zo‘ravonlikka uchraganini aytgan edi.

Bugundan uy-joy olish uchun subsidiyaga arizalarni qabul qilish boshlanadi

Ipoteka kreditiga davlat subsidiyasini olishga ariza berish xizmati qayta ishga tushirildi. Subsidiyalar ajratish yuzasidan arizalar tasdiqlangan parametrlar doirasida 2024-yilning 15-mayidan 1-noyabriga qadar qabul qilinadi.

Zo‘ravonlikka uchragan ayollarni reabilitatsiya qilish uchun vaqtinchalik boshpanalar yaratiladi

Tazyiq va zo‘ravonlikka uchragan xotin-qizlarga reabilitatsiya xizmatlarini ko‘rsatish uchun Ayollarni reabilitatsiya qilish va moslashtirish respublika markazining hududiy markazlarida vaqtinchalik boshpana (shelter)lar faoliyati yo‘lga qo‘yiladi.

Qashqadaryo hokimi 22 nafar mas’ulni lavozimidan bo‘shatdi

Shuningdek, 29 nafarini vazifasidan ozod etish bo‘yicha Respublika rahbariyatiga taqdimnoma kiritiladigan bo‘ldi. 41 nafar masʼullarga navbatdagi intizomiy jazo choralari qo‘llanilgan bo‘lsa, 27 nafarining faoliyati qoniqarsiz deb topilib, keyingi chorak yakunlari bo‘yicha ijobiy o‘zgarish qilmagan taqdirda, ularga nisbatan keskin choralar ko‘rilishi to‘g‘risida ogohlantirildi.

Telefonidan taqiqlangan materiallar chiqqan shaxs 12 yilga qamaldi

DXX Farg‘ona viloyati boshqarmasi tomonidan “Hizb at-tahrir al-islomiy” diniy ekstremistik oqimining faol aʼzosi bo‘lgan shaxs qo‘lga olindi.

Andijonda maktab direktori o‘rinbosari o‘quvchi qizlarga tegajog‘lik qilayotgani aytilmoqda

Bolalar ombudsmani mazkur holatni o‘rganib, o‘z kuzatuviga oldi. Hozirda holat bo‘yicha Andijon shahar IIO tomonidan tergovga qadar tekshiruv olib borilmoqda.

O‘zbekiston hududlarida kuchli yomg‘ir tufayli sel-suv toshqini yuzaga kelishi mumkin

16-22-may kunlari O‘zbekiston hududi bo‘yicha vaqti-vaqti bilan yomg‘ir yog‘adi, ayrim joylarda kuchli yomg‘ir yog‘adi, momaqaldiroq bo‘ladi. Respublika bo‘yicha ba’zi joylarda shamol tezligi 15-20 m/s gacha kuchayishi kutilmoqda, chang-to‘zonlar bilan kuzatilishi mumkin.

Tojikiston Markaziy Osiyo yagona energetika tizimiga qo‘shiladi

Tojikiston may oyi oxirigacha Markaziy Osiyoning yagona energetika tizimiga qo‘shilishi mumkin. Bu haqda O‘zbekiston energetika vaziri Jo‘rabek Mirzamahmudov ma'lum qildi.

Surxondaryoda qishloqqa kelib qolgan ayiq otib o‘ldirildi

Xabar berilishicha, ayiq aholi turar joylariga kirib, insonlar hayotiga xavf tug'dirgan. Ayiqni zararsizlantirish jarayonida u IIB xodimlaridan biriga tashlangan va jarohat yetkazgan. Shu bilan birga, 74-sonli maktab hududiga kirgan.

O‘zbekistonliklar turistik maqsadda eng ko‘p qaysi davlatga chiqayotgani aytildi

Statistika agentligi maʼlumotlariga ko‘ra, 2024-yilning yanvar-mart oylarida qariyb 1,3 mln nafar o‘zbekistonliklar turistik maqsadlarda xorijga safar qilgan.