3-mart kuni O‘zbekistonda sodir bo‘lgan muhim voqealar dayjesti

Yozuvchi Shodmon Otabek 79 yoshida vafot etdi

UzReport.news tahririyati marhumning oila aʼzolari va yaqinlariga chuqur hamdarlik bildiradi.

Iqtisodiyotda xususiy sektorning roli yanada oshiriladi

“Iqtisodiyotda raqobatni rivojlantirish va xususiy sektorning rolini yanada oshirish chora-tadbirlari to'g'risida”gi prezident farmoni qabul qilindi.

O‘zbekiston olimlari xorijiy atamalarni o‘zbekcha muqobillariga almashtirish bo‘yicha taklif bermoqda

Xorijiy atamalarni o‘zbekcha muqobillariga almashtirish bo‘yicha jamoatchilik yuborgan takliflar O‘zbekiston Respublikasi Atamalar komissiyasining ishchi kengashi – O‘zbekiston Fanlar akademiyasi O‘zbek tili, adabiyoti va folklori instituti olimlari tomonidan ko‘rib chiqildi.

Aziz Toshpo‘latov O‘zbekiston ichki ishlar vaziri lavozimiga tayinlandi

U tayinlovgacha Toshkent shahar ichki ishlar bosh boshqarmasi boshlig‘i lavozimida ishlab kelayotgan edi.

2024-yilda O‘zbekiston aholisi dori vositalariga jami 19,7 trln so'mdan ortiq mablag' sarflagan

Shundan 15,7 trln so'mdan ko'prog'i import preparatlar hamda salkam 4 trln so'm mahalliy ishlab chiqarilgan preparatlarga sarflagan.

Bir qator xo'jalik yurituvchi subyektlarning eksklyuziv huquqlari bekor qilinadi

Farmonga ko'ra, 2025-yil 1-apreldan bir qator xo'jalik yurituvchi subyektlarning faoliyat yo'nalishlari bo'yicha eksklyuziv huquqlari bekor qilinadi.

Toshkentda fuqaro itlar hujumidan so‘ng vafot etgani rad etildi

Ijtimoiy tarmoqlarda poytaxtda fuqaro itlar hujum qilishi oqibatida vafot etgani to‘g‘risida xabarlar tarqaldi. Shahar hokimligi bu maʼlumot haqiqatga to‘g‘ri kelmasligini bildirdi. Fuqaro o‘tkir yurak-qon tomir yetishmovchiligidan vafot etgan.

Yuqori Chirchiqdagi Agroxizmatlar markazida Xitoy tajribasi asosida urug‘chilik va ko‘chatchilikni yo‘lga qo‘yish rejalashtirilmoqda

Prezident Shavkat Mirziyoyev qishloq xo‘jaligi sohasida xalqaro hamkorlikni rivojlantirishga oid taqdimot bilan tanishdi.

Samarqandda hojatxona chuquridan chaqaloq qutqarib olindi

Samarqand viloyatining Nurobod tumanida IIO xodimlari hojatxonada tug‘ilib, uning chuquriga tushib ketgan chaqaloqning hayotini qutqarib qoldi. Ayol bungacha homilador ekanini bilmagan.

Donorlarga beriladigan pul mukofoti miqdori oshirildi

Qonun bilan “O'zbekiston Respublikasi faxriy donori” ko'krak nishoni bilan taqdirlangan shaxslar BHMning 15 baravari (5 mln 625 min so'm) miqdorida bir yo'la beriladigan pul mukofotini olishi belgilandi. Ilgari BHMning 5 baravari edi.

Po‘lat Bobojonov Prezident maslahatchisi o‘rinbosari lavozimiga tayinlandi

U 2017-yil sentyabrdan buyon ichki ishlar vaziri lavozimida ishlab kelayotgan edi.

Zulfiya nomidagi Davlat mukofotiga 19 nafar oliy taʼlim hamda ilm-fan vakillari sazovor boʻldi

Prezident qaroriga koʻra, 1 nafar o‘qituvchi, 3 nafar  tayanch doktorant, 1 nafar assistent, 4 nafar magistr, 10 nafar talaba-qiz a’lo xulqi, noyob iste’dodi, zukkoligi, tashabbuskorligi, o‘qishdagi muvaffaqiyatlari hamda ta’lim, fan, adabiyot, san’at, madaniyat, sport sohalarida erishgan alohida yutuqlari uchun Zulfiya nomidagi Davlat mukofoti bilan taqdirlandi.

Gruziya Bosh vaziri Irakli Kobaxidze rasmiy tashrif bilan O'zbekistonga keladi

4-5-mart kunlari Gruziya Bosh vaziri Irakli Kobaxidze rasmiy tashrif bilan O'zbekistonga keladi. Tashrif dasturidan qator ikki tomonlama uchrashuvlar va hukumatlararo qo‘shma komissiya yig‘ilishini o‘tkazish, sanoat korxonalari faoliyati bilan tanishish va boshqalar o‘rin olgan.