24-yanvar kuni O‘zbekistonda sodir bo‘lgan muhim voqealar dayjesti

O'zbekistonda ishlab chiqarilmaydigan laboratoriya jihozlari va anjomlari 2028-yil 1-fevralgacha bojxona bojidan ozod etiladi

Elektrotexnika sanoatini 2025–2027-yillarda rivojlantirish va yangi bosqichga olib chiqishning asosiy yo'nalishlari belgilandi.

Maltaning O‘zbekistondagi birinchi elchisi tayinlandi

Shuningdek, uchrashuvda O‘zbekiston va Malta o‘rtasida diplomatik pasport egalari uchun o‘zaro vizasiz rejim joriy qilish to‘g‘risida bitim imzolandi.

Senat "Oziq-ovqat xavfsizligi to‘g‘risida”gi qonunni ma'qulladi

Qonun bilan Qishloq xo‘jaligi vazirligi oziq-ovqat xavfsizligini taʼminlash sohasida vakolatli davlat organi sifatida belgilanmoqda. Vazirlikka bu bo'yicha bir qancha huquq va majburiyatlar belgilandi.

2024-yilda O‘zbekiston yalpi ichki mahsuloti 115 mlrd dollarga yetdi

O'tgan yili O‘zbekiston yalpi ichki mahsuloti 1,45 kvadrillion so‘mdan oshdi. Bu miqdor yil davomida Markaziy bank eʼlon qilgan dollar kurslarining o‘rtacha miqdoridan kelib chiqilsa, taxminan 115 mlrd dollarga teng bo‘ladi.

Toshkent shahridagi maktab o‘quvchilarining 2 nafarida sil aniqlandi

Poytaxtning Shayxontohur tumanidagi 59-maktabning 11-sinf o‘quvchisida sil kasalligi aniqlangan. Bu haqda SSV ma'lum qildi. Tekshiruvlar davomida 4 nafar kishida kasallikka moyillik aniqlangani sababli profilaktik davo muolajalari boshlangan. Shundan so'ng 59-sonli umumtaʼlim maktabi direktoriga nisbatan maʼmuriy bayonnoma rasmiylashtirilgan. Hozirgi vaqtda maktab vaqtincha yopilib, o‘quvchilar darslarni boshqa maktablarda o‘tmoqda.

Senat huquq-tartibot xodimlari videolarini "obro‘sizlantirish maqsadida" tarqatishni taqiqlovchi qonunni maʼqulladi

“Huquqni muhofaza qiluvchi organlar xodimlarining jamoat xavfsizligini taʼminlash bo‘yicha xizmat vazifalarini bajarayotgan paytda olingan foto – va (yoki) videotasvirni ularni obro‘sizlantirishga olib keladigan tarzda buzib tarqatish, shu jumladan Internet jahon axborot tarmog‘ida tarqatish” uchun maʼmuriy javobgarlik belgilanmoqda.

Nufuzli xalqaro brendlardan jalb qilingan texnolog, dizayner, marketolog kabi mutaxassislar uchun yig'im undirilmaydi

Shuningdek, milliy brendlarni yaratish uchun jalb qilinadigan xorijiy mutaxassislarning O'zbekiston hududida mehnat faoliyatini amalga oshirish huquqini beruvchi tasdiqnomalarni berish tartibi soddalashtiriladi.

Avtomobilni takroran mast holda boshqarganlik uchun jinoiy javobgarlik belgilanmoqda

Shuningdek, Maʼmuriy javobgarlik to‘g‘risidagi kodeksda transportda bezorilik, yaʼni ayrim haydovchilar tomonidan boshqarish madaniyatiga rioya qilmay, transport vositasini keskin boshqarish va boshqa harakatlarda ifodalangan “agressiv boshqarish”, “drift”, “shaxmat” shaklida harakatlanish, yo‘llarda to‘siqlarni paydo qilish kabi qoidabuzarliklar uchun maʼmuriy javobgarlik belgilanmoqda.

Senat kafolatlangan omonatlarni 200 mln so‘mgacha cheklashga qaratilgan qonunni ma’qulladi

Kafolatlash hodisasi ro‘y berganda Omonatlarni kafolatlash agentligi tomonidan bir omonatchiga har bir bankda kafolatlash obyektining qoldig‘i 200 mln so‘m miqdorida yoki undan kam bo‘lsa to‘liq hajmda kompensatsiya to‘lanishi belgilab qo‘yilmoqda.

O‘zbekistonda elektron sigaretalar taqiqlanadi

Qonun loyihasi bilan O‘zbekistonda nikotinni iste’mol qilish moslamalari, shu jumladan elektron sigaretalar va ular uchun suyuqliklarning muomalasi (ishlab chiqarish, tayyorlash, saqlash, tashish yoki o‘tkazish, O‘zbekiston hududiga olib kirish, olib chiqish) taqiqlanmoqda.

O'zbekistonda huquqbuzarliklarning ijtimoiy profilaktikasi samaradorligi oshiriladi

Mahalla raisi “mahalla yettiligi” va mahallaga biriktirilgan davlat organlari bilan ijtimoiy profilaktika tadbirlarini tashkil etadi.

Turistik maqsadlarda Misrga safar qilgan O‘zbekiston fuqarolari 47,4 ming nafarni tashkil etdi

Statistika agentligi ma’lumotlariga ko‘ra, bu ko‘rsatkich o‘tgan yilning mos davri bilan solishtirilganda 17,9 ming nafarga yoki 60,7 % ga oshgan.

Endilikda 18 yoshga to‘lmagan va 60 yoshdan oshgan shaxslar pasport tizimi qoidalarini buzganlik uchun javobgarlikka tortilmaydi

Pasport tizimi qoidalarini buzganlik uchun jarimalar huquqbuzarliklarning ijtimoiy xavflilik darajasidan kelib chiqqan holda maqbullashtirilib, ularning aniq miqdori belgilanmoqda.

O'zbekistonda injenerlik maktablari tashkil etiladi

Jizzax viloyatidagi 1-son politexnikumi hamda Toshkent viloyatidagi Ohangaron shahar politexnikumi huzurida injenerlik maktablari tashkil etiladi.